比比の手札

“愛是神奇的，它使數學法則失去了平衡：兩個人分擔一個痛苦，只有半個痛苦；而兩個人共享一個幸福，卻有兩個幸福。”

“你因為佢而停留響原來既世界，但世界唔會為你而停留，佢既世界依然不停進步，結果令兩個人既距離越來越遠。”

“當一個人響自己身邊既時候覺得係好理所當然，但當冇左既時候先知果個人原來對自己好重要”

我尋日話發夢見到果隻豬豬，就係呢隻喇！原來大豬媽入面係得四隻小豬嘜，我仲記錯係六隻添，可以見返佢，我真係好開心呀！我ｄ朋友話我好易滿足，其實我覺得，好少事已經可以令我好開心，我算係一個易喊易笑既人，我呃唔到人，佢地一睇就知我咩心情，我唔會唔開心既時候迫自己笑，尋晚，ｏｔ到十點幾，已經好攰，個腦攰到諗唔到野，不過份計劃真係好趕，結果唯有拎返屋企再做過，返到屋企，已經十一點幾，沖左個好舒服既涼，之後就開始我未完既工作，好在有人幫手咋，做到差唔多三點，初稿終於完成，但個人已經散哂，結果今日唔知醒遲到，不過好彩冇俾人話，而家好想訓覺，公公今日休息，本來今朝公公話同我食早餐，但結果我太攰太眼訓，唔肯起身，所以冇陪佢食早餐，下次先補返數啦，雖然唔夠訓，但今日個感覺令我覺得好舒服，天氣唔凍唔熱啱啱好，如果今日係假期，我諗我會去大澳或者長洲果類地方行下，我真係好鐘意咁既天氣，我深深感受到天氣可以影響人既心情，我唔討厭落雨，雖然好唔方便，但有時我會幾享受落雨出街既感覺，我怕熱，但我又鐘意勁熱既開大冷氣訓覺同熱辣辣既時候去海灘玩水果種自然既感覺，我唯一討厭既天氣，就係悶熱又焗又潮濕既天氣，令人周身痴立立，好唔舒服，心情都會跟住差，好彩今日天氣超級好，而家望出去維多利亞港真係海天一色，就算做野做得好攰，望一陣海心情即刻舒服哂，人都精神ｄ，好了，又開始要努力做埋我未做好既工作嚕～

今日突然想起小時候一件心愛既玩具，係一隻肥豬毛公仔，係一隻玉色既圓碌碌豬仔，豬豬底部有一條拉鍊，拉開入面有六隻豬ｂｂ，好懷念呢個玩具，我相信而家應該好難搵得返，如果有一日俾我搵得返咁就好喇！仲有好多玩具，飛行棋，鬥獸棋，康樂棋，波子橫，仲有大富翁，因為我細個冇兄弟姐妹同我玩，咁我ｄａｄｄｙ媽咪就自然會係我對手，我仲會玩ｂａｒｂｉｅ，記得我媽咪都會好好心機同我買ｂａｒｂｉｅ衫，幫佢換衫，整到佢好靚，仲有，我細過有好多合金細車仔，記得有一次俾我婆婆掉哂，我唔開心左好耐，因為我儲左好耐先有一個私人車場，都有過百架車，我婆婆掉哂之後，佢用一塊神奇畫板打發左我，之後我就再冇玩車仔，仲有用紙做既公仔衫，同ｂａｒｂｉｅ玩法差唔多，都係換下衫扮下靚，我細個既時候，仲係荔園既常客，除左鬼屋永遠唔會入之外，幾乎荔園冇咩我未玩過，掉香口膠，雖然細個時自己唔食香口膠，但就一定掉好多返屋企，仲有ｌｅｇｏ，我好鐘意玩，但媽咪就唔會俾我成日玩，唉．．．真係好懷念細個時無憂無慮既生活呀！

本來我個朋友已經好返好多，原來約左今日同佢出去行下街開解下佢，點知佢今朝打電話俾我，我認唔出佢把聲，沙哂，好沉，細問之下，原來佢尋晚又同個渣滓嘈交，個渣滓仲出手打佢，叫我朋友報警佢又唔肯，我朋友鬧個渣滓，話佢咁大個女老豆呀媽都冇打過佢，點知個渣滓竟然答我朋友，我咁大個人都未打過女人，你係第一個迫我出手既女人，有冇攪錯？！咩人離架，一個打女人既男人，仲算係男人咩？我好嬲呀，真係好嬲！就連兩個未懂事既小朋友都咁講，佢地同我講，”我憎死爸爸，以後都唔想見到佢，契媽你幫我叫佢走啦”，果一刻我好心酸，覺得兩個小朋友好可憐，之後同我朋友傾傾下，我情緒突然失控，喊左出離，唉～我係想安慰佢，點知連我自己都．．．．．

我朋友同我講，佢放唔低八年感情，感情？！個渣滓對佢有感情可言嗎？！！我覺得佢係唔甘心，佢會覺得點解自己響呢八年入面做左咁多野，為個渣滓付出咁多，換來既係今日既結果，我明白唔可能係一時三刻話放低就放低，所以我都冇迫佢放低，我只想佢可以好好生活，為自己好，為兩個小朋友都好，提議佢見社工，睇心理醫生，感覺到佢好抗拒，我都明白，有邊個想俾人知道自己有咁既遭遇，覺得好無奈，自己可以做既畢竟有限，我一星期放兩日假，就當我陪到佢兩日，咁一至五小朋友返左學，好擔心佢會亂諗野，唔知再會做出ｄ咩？！佢媽咪都有搵我傾過，當然同我一樣咁擔心佢啦，但我可以點呢？叫我睇住佢，我又可以睇到幾多呢？佢打俾我我當然會開解佢同佢傾，但如果佢唔打俾我呢？我總冇可能廿四小時不停地打俾佢，定每四小時一次，每次傾半個鐘？佢心結太大，根本冇人幫佢解得開，就只可以靠佢自己，所以呢幾日我都好唔開心，我真係希望，佢可以快ｄ好返！！

尋晚收到個好壞既消息，我一個識左十幾年既好朋友，為左一個已經無可救藥既人（其實果個根本唔可以用”人”字離形容既人）而自殺三次，好彩既係，佢三次都冇事，我打算咁同佢講．．．”為一個咁既渣滓而自殘身體，值得咩？你咁樣只會令鍚你擔心你既人心痛，你唔好咁傻啦，你仲有我地嘛，你唔會咩都冇哂，佢只係你人生其中一個故事既配角咋，你唔開心可以搵我傾丫，日頭又好，夜晚又好，半夜我都唔怕，只要你想搵人傾，你一定要搵我，由佢第一次俾我見到佢同第二個一齊之後，佢根本冇心改過，佢不停變本加厲，我問你佢有咩好，只要你答得出我佢有一樣野係好既話，我唔會阻止你繼續傻落去，你問我你可以點？其實你而家要做既，就係唔好俾自己壓力，分唔分開一唔一齊唔係重點，重點係你覺得點樣可以令自己舒服ｄ，好過ｄ，就算你真係為佢傷害自己，佢會變返好咩？佢會內疚？佢會為你心痛？個答案你同我都知，佢係一定唔會，你有事的話，我兩個寶貝契女以後點生活？佢地已經冇咩父愛，佢地仲咁細，唔可以冇埋媽咪，你冇諗過佢地既咩？！”雖然係有點直接，但我同佢既溝通一直都係咁直接，我好想將我擔心佢既事實話俾佢知，我呢個朋友，係一個幾坎坷既女仔，佢同左而家呢個渣滓八年，幫佢生左兩個可愛既女兒，個男的遲遲唔肯同佢結婚，響出面有ｎ個女人，我朋友因為要照顧兩個女，冇返工，個渣滓從來唔會俾生活費佢，每個月只交屋租，每日放低幾十蚊俾佢三母女食飯，有時仲唔會俾，女兒讀幼稚園，學費要我朋友家人俾，只會當我朋友呀四，當我朋友懷著細女的時間，仲俾我地親眼見到佢拖住第二個女人響我地面前出現，我朋友一次又一次原諒佢，但佢根本冇改過的意圖，不停傷害我朋友，所以每次提起呢個渣滓，我都會火大，世間上點解仲會有ｄ咁既男人？好嬲～～～～～～～～～～～～～～～～！

本來計劃得好好既復活節假期，因為牙痛，結果邊度都冇去，好慘，原來牙痛係唔可以剝牙，咁點算？由得佢痛？救命呀！止痛藥我已經免疫左，鹽水冰水都已經冇用，仲有咩方法可以減低我既痛苦？！食又食唔到，最慘既係，一訓低就會好痛，仲影響到成個頭都痛埋，好痛好痛好痛好痛．．．．．．．．．．．．．！！！

我今日的假期，在睡夢中渡過，昨晚整夜都睡不著，因為我牙痛，痛得很利害，終於感受到”牙痛慘過大病”這道理，相信受牙痛影響，連整個頭也在痛，吃了止痛藥，都一樣沒用，結果，我整晚就喝冰水，用鹽水澈口，擦牙，不停的重複，到天亮了才睡著，好痛苦哦！現在還是痛，沒心情，今天日記到此為止。