不安感
2006年05月04日
呢幾日，心情真係差得非常緊要，冇特別事發生，但覺得自己好多事要諗，原來好多問題等住我解決，以前事無大小，都有ｍ先生幫我解決幫我諗，佢總會俾到一ｄ建議我，開解到我既問題，但唔知點解，呢排我既唔開心我都唔想俾佢知道，我係唔想佢擔心我定係覺得佢幫唔到我？我好鐘意好依賴俾佢照顧既感覺，之前我覺得一直可以咁樣會係我最嚮往既生活，最近我同ｍ先生冇特別事發生，但我有一種感覺，我覺得同佢好似越來越遠，我感覺到我同佢將會有事發生，有一種不安既感覺，曾經我認為我同ｍ先生會係好美滿幸福的一對，但時間越耐，大家分歧越來越多，呢ｄ分歧未至於會令我地分開，但心裡面就總有一點失落，我覺得，佢由好明白我變得唔明白我，之前的心靈相通都漸漸冇左，究竟係我變定係佢變？時間越耐，感覺越生疏，佢唔係唔緊張我唔錫我，呢一點我可以肯定，只係覺得好奇怪，點解大家會越來越遠？有同佢傾過大家既感覺，但佢答我覺得冇問題，覺得大家都冇改變，結果就各持己見，唔想變成罵戰，唯有東講講西說說的拉開話題，開始有一點唔知自己想講乜，思想有一點混亂，開始覺得自己好孤單，或者真係自己諗多左啦，我好想靜下，唔想同人講野，只希望呢種不安感快點消失！
Posted in: 隨心, 戀愛 |
回應(2) | 回應的RSS | 暫時未有引用通告| 
(0)
