比比の手札

難得有一日真正屬於自己既假期，好耐冇試過好似今日咁大昏迷，可能近日天氣唔係太穩定，整個人都覺得唔係好舒服，尋晚食左藥，由凌晨兩點鐘，一覺訓到今日下午六點半，冇錯，係下午，中途起身飲過三杯水，去左五次洗手間，今日個電話竟然出奇地咁乖，只有annie打過一次俾我，不過佢知我訓緊覺，只叫我訓醒打返俾佢，可能訓得太多，手軟腳軟咁，好累哦～！可能太耐冇野落肚，一陣搵野醫醫肚先，但係到而家，都感覺到冇咩胃口~”~我打算今日唔出去嚕，陪下我三隻寶貝狗狗玩下就算，因為最近真係好忙，好似冷落左佢地，就用今日同佢地玩返夠，小型family day^^

“用$88買一個小時的快樂,你覺得值得嗎?”        “當然不值啦,快樂何需用錢買” 

“一段情可以帶來這麼大的傷害，那一定曾經帶來很大的快樂，愛情就是這樣。”

“我終於知道咩叫最愛，原來有d野你要失去左，至知自己擁有過”

 ”要父母原諒子女就容易，但要子女原諒父母就比較困難。”

“死亡和愛情一樣，都是很霸道的。”

“愛情使人忘記時間，時間也使人忘記愛情。”

其實覺得幾有意思的，有好多時候，人都會不知不覺間被混亂，好多事其實好明顯，但自己卻看不出來，這算當局者迷吧，我相信每個人總有試過俾自己一些藉口去逃避或處理一些事情，有一點自欺欺人，事實已經擺在眼前，但因為不能接受而製造各式各樣的藉口，想令自己心裡好受一點，但．．．問題真的解決了嗎？！

今日我的心情好返好多嚕，尋晚我難得的不用ot，晚餐後就急不及待返屋企，我真的很累了，突然諗起尋日睇的”小豬故事”，諗左好多野，原來，我真係好幸福，起碼我知道我身邊都有隻默默守候我既豬公，雖然佢唔識表達佢自己，但行動上話左俾我知道，佢係緊張我愛鍚我，雖然甜言蜜語永遠欠奉，但都唔緊要哦！因為我不在乎！我只在乎佢心裡面有冇我，當然，在適當的時候，一些甜言蜜語不可少，但說得太多，也未免有一點膩吧？！有一句說話，我成日掛在口邊，”聽日發生咩事冇人知”，我唔知道將來我同佢會係點，唔知道仲會唔會再一齊，也許我對自己沒什麼信心吧？！我已經記不起我從何時開始由自信變得自卑，好想從新振作！我將會有一個新開始，放棄舊的工作，接受新的工作，相信新公司不會像現在這麼大工作量吧？希望我可以有更多自己的私人時間，關心一下身邊的人，自從返左而家這份工作後，就像賣了身一樣，冇哂自己既時間，每天都係工作，工作再工作，很討厭咧～！係時候俾自己放鬆一下，好好享受生活，尋找生活中既樂趣，我嚮往自由，想俾自己一個長假期，唔一定要去旅行，就算響屋企都可以，就讓我一直繃緊既生活慢慢放鬆下來～

今日好多人都去拜山，我係一個唔鐘意拜山既人，我唔會響清明同重陽節拜山，我成日覺得，只要我有心，任何時候都可以拜山，如果我一年只有兩日會懷念我已去世的婆婆同爺爺，我會覺得自己好不孝，清明重陽我唔會拜山，因為我最怕同人迫，一大班孝子賢孫加祭品浩浩蕩蕩的拜山，我有點受不了，我又會覺得，既然人死後才抽兩天時間去拜祭，倒不如趁他們在世時多加陪伴，我總認為，拜山只係一個傳統吧？當然，我都會去拜山，我去拜山既目的，只係為幫他們清理一下，並唔一定要等清明重陽，今日假期，我選擇響屋企訓覺，之後同左我媽咪去食野，買左一大堆清潔用品，係時候將屋企打理一下，每天忙得要命，一堆又一堆的工作，放工返到屋企已經疲憊不堪，難得放假在家，自然想多休息，久而久之，我發覺我屋企已經像被劫現場一樣，人地唔知，以為我屋企剛被人打劫完，亂七八糟的，所以今日我下定決心，要將屋企回復原來面貌，或者唔想自己靜下來吧，就當俾個藉口自己做ｄ有建設性既野囉～要開始了～！！！

人總會經歷失去才會學懂珍惜？也許吧？！

勇氣～！到底有幾多人會有無比既勇氣？由ｂｂ仔學行既時候需要勇氣踏出第一步開始，成長既歷程入面，唔多唔少都需要一份勇氣，生存左咁耐，我發覺原來我一ｄ勇氣都冇，就連好簡單既一步我都冇勇氣踏出，突然覺得自己好冇用，今日心情極度低落，整天做事都提不起勁，彷彿魂遊太空一樣，腦入面一片空白，忙左大半天，都唔知自己到底做緊乜野？可悲！

今日去左剪頭髮，剪左一個幾滿意既髮型，好似ｂｂ咁，放心，唔係好似果張ｂｂ仔相咁，不過真係剪得好得意，剪到成個小朋友咁，而且仲唔駛好貴，盛惠＄６８蚊，平靚快正抵，係咁多年以離最滿意既一個髮型，清爽自然，剪定個靚頭頭迎接夏天既來臨，心情靚靚，呵～

咁多年以離，都ｋｅｅｐ住一把長頭髮，我一向多頭髮，但都唔算難打理，我綜合左各方面既意見之後，我諗呢個髮型都會ｋｅｅｐ返一段時間，起碼唔係果種個髮型唔襯面型而個面型又撞落個身型果種，唔係誇張架，我真係成日見人係咁架，以名人”八兩金”為例，就完全符合上述既條件．．．

尋晚同呀ming傾msn傾左好耐，知道左好多關於佢既野，每個人都有好多唔想俾人知既秘密，不過經過尋晚之後，對呀ming有所改觀，同佢傾計都幾舒服，佢應該可以係一個幾好既朋友，ming…如果你睇到既話，我希望你永遠都開開心心，放得開自己，拿得起別人，世界自然大，你要加油哦～！！！

最近有一套戲，個戲名好似叫愛女人購物狂，響某程度上，我唔會反對呢個講法，我覺得購物的，真係多數係女人，上至置地，下至加連威，我有留意過，響有野賣既地方男女比例大約５：１，即係條街十個人入面有八個係女人，講到購物，有邊個女人唔會雙眼發光丫？邊個夠膽話男人唔鐘意購物架？不過只係大家鐘意買既野唔同之嘛，貴有貴買，平有平買，我自己本身都係一個購物狂（程度：超級），有時買野會睇心情，幣在我性格上有一種缺陷，就係開心會咩都覺得靚，自然咩都想買，唔開心既時候就好想好想買好多野令自己開心返，出糧又會俾藉口自己買野獎勵下自己，糧尾又會諗住都就出糧，想買咪買囉，結果，唔駛我講啦，我既”戰利品”越來越多，咁我多數會買咩呢？等我統計下先．．．衫褲鞋襪唔少得，手袋，飾物，公仔，ｂ女，化妝品，護膚品．．．我戰利品之多，程度達黎克特制 8.5級，一個人用兩個衣櫃都擺唔哂既衫，一個鞋櫃放左廿幾對鞋仲有幾對要收響窿窿罅罅，ｂ女同公仔亦已經攻陷我成間房，床同梳化，其實我知道自己好多野，真係唔駛買，我媽咪成日掛響口邊既一句說話，”你D衫，十年唔買都夠著”，係架，佢冇作大到，真係十年（甚至唔止）都著唔哂，無奈我知道自己係多，但就係忍唔住手唔買，見到靚既，又唔係好貴，買囉！當然要睇下同行既係魔鬼定天使喇，通常男既就會話，鐘意就買啦，女既就會中立少少，至於媽咪就多數係反對派，不過我又覺得自己鐘意買野既程度達到病態階段，當然唔會要碌爆卡買啦，不過有時窮窮地，都會去超級市場狂掃貨，只要幾百蚊，就可以滿足哂我既購買慾，而且仲比較實際，其實我唔係好在乎我要買幾多野？我只係好享受買野既過程，不過我隔離果個就辛苦嚕=3=，因為佢要幫我拎大袋細袋既戰利品，好彩我識親既人都會自告奮勇幫我拎，風度可加，響度多謝你地先~^^~，不過呢，過左咁多年購物狂既生活，而家已經冇以前咁癲嚕，有時想買野，都會睇下有冇用先買，唔會好似以前咁亂買，係唔係都買，而家想買野，就會去超級市場囉，哈～其實好彩香港有我地既類人，推動香港經濟，增加就業機會，只要適可而止，購物其實可以係一種好好既享受！