比比の手札

我剛剛發左一個夢，夢入面我見到好多好耐冇見過既人，個個人都對住我微笑，之後一個一個咁響我面前消失，我講野佢地聽唔到，最後淨返我一個，之後周圍既環境開始變黑，好黑好黑，我咩都睇唔到，之後我就醒左。醒左之後，覺得好驚，到而家都訓唔返，同時不安既感覺又開始，我真係好怕一個人，我好驚，真係好驚。

“愛是神奇的，它使數學法則失去了平衡：兩個人分擔一個痛苦，只有半個痛苦；而兩個人共享一個幸福，卻有兩個幸福。”

“你因為佢而停留響原來既世界，但世界唔會為你而停留，佢既世界依然不停進步，結果令兩個人既距離越來越遠。”

“當一個人響自己身邊既時候覺得係好理所當然，但當冇左既時候先知果個人原來對自己好重要”

我尋日話發夢見到果隻豬豬，就係呢隻喇！原來大豬媽入面係得四隻小豬嘜，我仲記錯係六隻添，可以見返佢，我真係好開心呀！我ｄ朋友話我好易滿足，其實我覺得，好少事已經可以令我好開心，我算係一個易喊易笑既人，我呃唔到人，佢地一睇就知我咩心情，我唔會唔開心既時候迫自己笑，尋晚，ｏｔ到十點幾，已經好攰，個腦攰到諗唔到野，不過份計劃真係好趕，結果唯有拎返屋企再做過，返到屋企，已經十一點幾，沖左個好舒服既涼，之後就開始我未完既工作，好在有人幫手咋，做到差唔多三點，初稿終於完成，但個人已經散哂，結果今日唔知醒遲到，不過好彩冇俾人話，而家好想訓覺，公公今日休息，本來今朝公公話同我食早餐，但結果我太攰太眼訓，唔肯起身，所以冇陪佢食早餐，下次先補返數啦，雖然唔夠訓，但今日個感覺令我覺得好舒服，天氣唔凍唔熱啱啱好，如果今日係假期，我諗我會去大澳或者長洲果類地方行下，我真係好鐘意咁既天氣，我深深感受到天氣可以影響人既心情，我唔討厭落雨，雖然好唔方便，但有時我會幾享受落雨出街既感覺，我怕熱，但我又鐘意勁熱既開大冷氣訓覺同熱辣辣既時候去海灘玩水果種自然既感覺，我唯一討厭既天氣，就係悶熱又焗又潮濕既天氣，令人周身痴立立，好唔舒服，心情都會跟住差，好彩今日天氣超級好，而家望出去維多利亞港真係海天一色，就算做野做得好攰，望一陣海心情即刻舒服哂，人都精神ｄ，好了，又開始要努力做埋我未做好既工作嚕～

本來我個朋友已經好返好多，原來約左今日同佢出去行下街開解下佢，點知佢今朝打電話俾我，我認唔出佢把聲，沙哂，好沉，細問之下，原來佢尋晚又同個渣滓嘈交，個渣滓仲出手打佢，叫我朋友報警佢又唔肯，我朋友鬧個渣滓，話佢咁大個女老豆呀媽都冇打過佢，點知個渣滓竟然答我朋友，我咁大個人都未打過女人，你係第一個迫我出手既女人，有冇攪錯？！咩人離架，一個打女人既男人，仲算係男人咩？我好嬲呀，真係好嬲！就連兩個未懂事既小朋友都咁講，佢地同我講，”我憎死爸爸，以後都唔想見到佢，契媽你幫我叫佢走啦”，果一刻我好心酸，覺得兩個小朋友好可憐，之後同我朋友傾傾下，我情緒突然失控，喊左出離，唉～我係想安慰佢，點知連我自己都．．．．．

我朋友同我講，佢放唔低八年感情，感情？！個渣滓對佢有感情可言嗎？！！我覺得佢係唔甘心，佢會覺得點解自己響呢八年入面做左咁多野，為個渣滓付出咁多，換來既係今日既結果，我明白唔可能係一時三刻話放低就放低，所以我都冇迫佢放低，我只想佢可以好好生活，為自己好，為兩個小朋友都好，提議佢見社工，睇心理醫生，感覺到佢好抗拒，我都明白，有邊個想俾人知道自己有咁既遭遇，覺得好無奈，自己可以做既畢竟有限，我一星期放兩日假，就當我陪到佢兩日，咁一至五小朋友返左學，好擔心佢會亂諗野，唔知再會做出ｄ咩？！佢媽咪都有搵我傾過，當然同我一樣咁擔心佢啦，但我可以點呢？叫我睇住佢，我又可以睇到幾多呢？佢打俾我我當然會開解佢同佢傾，但如果佢唔打俾我呢？我總冇可能廿四小時不停地打俾佢，定每四小時一次，每次傾半個鐘？佢心結太大，根本冇人幫佢解得開，就只可以靠佢自己，所以呢幾日我都好唔開心，我真係希望，佢可以快ｄ好返！！

本來計劃得好好既復活節假期，因為牙痛，結果邊度都冇去，好慘，原來牙痛係唔可以剝牙，咁點算？由得佢痛？救命呀！止痛藥我已經免疫左，鹽水冰水都已經冇用，仲有咩方法可以減低我既痛苦？！食又食唔到，最慘既係，一訓低就會好痛，仲影響到成個頭都痛埋，好痛好痛好痛好痛．．．．．．．．．．．．．！！！

M先生——–係一個唔善於表達自己既人，我同佢既故事，開始得好耐人尋味，事實上，好多人都唔睇好我同佢既結局，我同Ｍ先生屬同一類人，執著啦，脾氣壞啦，但記得初初開始既時侯，總覺得同佢係兩個世界既人，響網上睇過有人講既一句說話，改變左我同Ｍ先生既故事，”兩個唔同世界既人走在一起不是更好嗎？那你們一起就可以有兩個世界，比其他人多一個世界，可以領略多一點別人領略不到的”，漸漸我開始明白到這個”道理”，果然同Ｍ先生一齊之後，體會多了很多之前想都沒想過既事，當中有苦有樂，算是我跟他的一點點經歷吧，諗返起覺得好有趣，就算到現在，有時諗返起都會由心笑出離，Ｍ先生響我心裡面係一個好特別既人，佢好似一個魔術師，佢會將我既唔開心變走，變返開心既事俾我，我會成日諗，係咪每個人心裡面都會有一個魔術師既呢？Ｍ先生令我改變好多，真係好多，佢好了解我，但我覺得佢好難捉摸，我對佢唔係唔了解，只係有一點疑惑吧？我成日會覺得，佢有好多野我係唔知既，雖然有時好多野，唔知好過知，但總會想知道多一點點，比喻當我見到佢好似有心事，唔多出聲，就會覺得佢有野諗，但每次問佢，佢總答我”冇事”，究竟佢係唔想我擔心唔俾我知，定係有野唔俾得我知呢？兩個人一齊欠缺一份信任，係一個好大的問題，兩個人一齊唔係應該坦承相對嗎？就算有咩開心唔開心都應該互相分擔嗎？佢算係一個大男人，有咩都收收埋埋，唔想我擔心，結果有咩事都自己一個人承擔哂，同佢一齊，我覺得好幸福，我鐘意俾佢照顧既感覺，佢講過要我係世界上最幸福既女人，其實佢咩都唔駛俾我，只要我同佢一齊開開心心，我就已經覺得係最幸福既人，好多人問我Ｍ先生有咩好，很抱歉，我實在答唔出佢有咩好，我覺得佢係最好既，咁就夠嚕，有時感情就係咁，只係一份感覺，唔一定要講出佢既優點，只要一齊感覺到果份愛既感覺，比起一個十全十美既人更重要，愛情就係令人盲目！

今日係復活節假期前夕，本來公司有好多野等住我返去做，唔知係咪因為尋晚食左藥先訓，而上今日天氣又涼返，竟然唔知醒，起身既時候已經九點，加上頭真的好痛，結果我今日冇返工，而家諗緊放完假之後，我打仗既日子又要持續落去，我就．．．唉～～

而家做緊既工作，真係好辛苦，每天一大堆大大小小既工作，我每日早上九點開始，忙到夜晚九至十點，我估冇咩幾多返寫字樓既人會每天工作十二，三，四個鐘，每日ｏｔ，但工作一樣做唔完，有時都會自怨自艾，咁辛苦為左咩丫？無他既，想俾屋企人有個好ｄ既生活環境囉，記得細細個既時候，ｄａｄｄｙ媽咪問我想唔想要細佬妹妹，我因為怕俾人分薄所有人對我既愛鍚，我答佢地唔要！而家真係有ｄ後悔，見朋友同佢地既兄弟姐妹有商有量，屋企有咩事都多個人俾意見，多個人幫手解決，而我，屋企所有大小事務都係我一個人攪哂，有問題既時候唔想ｄａｄｄｙ媽咪擔心，所以扮冇野，其實我好想有個人陪我分擔一下，我ｄａｄｄｙ媽咪得我一個女，當然視我如珠如寶啦，所以就算我幾忙都好，我都會盡量抽時間陪佢地，我而家做既一切，其實都係為佢地而做，我辛苦ｄ又有咩所謂丫，我仲後生，捱得住，我只希望佢兩個身體健康，開開心心就算，雖然我俾唔到ｄ咩既好野佢地，唔算有福俾佢地享，但我會盡可能俾最好既佢地，幸好，佢地係好易滿足既ｄａｄｄｙ媽咪，我地一家三口，去麥當當都可以好開心，ｄａｄｄｙ，媽咪，ｉ　ｌｏｖｅ　ｙｏｕ！！