比比の手札

今日同二舅父同埋媽咪同埋軒軒去打邊爐，食物麻麻，服務態度更是劣，我地三大一細都食得好飽，除左好飽之外，還是好飽，冇其他更適合既形容，食完之後，落好大雨，經過一間賣銀器既小店，突然想起我條心愛小手鍊斷左仲未整，問老闆有冇得整，老闆話：哦，好易姐！兩蚊啦！！，@.@兩蚊?!佢話二百蚊我都諗住整，結果以老闆熟練的技術，唔駛一陣已經幫我整好，盛惠兩蚊！好開心，終於可以帶返嚕～

原本今日係好愉快的一天，整天心情都很好，沒有令我不悅的事情發生，但晚飯時聽到一個惡耗，令我想了很多東西，同媽咪食完晚飯，買左個木門欄，門欄的目的是為了我的寶貝小狗，我們不在家的時候，就把牠們安置到門欄後，門欄後就是牠們的小天地，以免牠們造成破壞，不得不把牠們活動範圍有所限制，跟他們ｄａｄｄｙ合力把門欄裝好後，就把呀ｍｉｋｅ的長毛剪掉，天呀！！！呀ｍｉｋｅ剪毛後，由一隻灰色史立莎，變成一隻白色史立莎@.@?之前只知道呀ｍｉｋｅ是比較淺色，怎也想不到牠原來是白色的，現在的小ｍｉｋｅ　ｍｉｋｅ就像一隻小羊一樣，好可愛，相反多多就比較令我心疼，剪毛後發現牠瘦了很多，一定要給牠多吃一點，至於妹妹，一樣是肥妹妹，牠們ｄａｄｄｙ最疼妹妹，也許是妹妹的身型最小，胖胖的，四肢很短，像一個球一樣，正確來說，妹妹活像一個保齡球，毛色比較黑，現在我們家的三隻史立莎，一黑一灰一白，雖說妹妹跟ｍｉｋｅ都很可愛，但我還是最疼愛多多，也許是因為多多比牠們更需要愛護吧！多多由小皮膚也有小毛病，坦白說，多多的外表是一隻不吸引的狗狗，牠很瘦，瘦得叫我很心痛的那種瘦，可能妹妹跟ｍｉｋｅ太肥而令我有這感覺吧！別人來訪我們家，都是愛抱抱妹妹，親親ｍｉｋｅ，反而對多多不太留意，既然別人都疼妹妹跟ｍｉｋｅ，疼錫多多的責任就交給我好了，晚飯時媽咪跟我說了一個壞消息，她說我舅母養的西施狗給人道毀滅了，牠叫杯杯，十五歲了，多年前有一隻眼瞎了，就只有一隻眼可以看東西，上星期日母親節的事，舅父舅母發現牠行動有問題，就帶杯杯去看獸醫，獸醫說杯杯患了骨癌，必須動手術把牠的腳切掉，但杯杯年紀已很大，獸醫建議把杯杯人道毀滅，這樣相信比較令杯杯不用受不必要的痛苦，結果那天，杯杯就離開我們了，我了解舅母的心情，聽媽咪說她哭了好幾天，哭得死去活來，令我想到六年前我的呀ｂｅ離開我的時候，我也是哭得死去活來，心臟就像被刀割一樣，希望舅母可以看開點，對杯杯的離開我也感到很可惜，但以狗狗來說，能夠活到十五歲，已經算很不錯的了，杯杯不用再熬下去，到愉快的地方繼續生活，把牠人道毀滅，相信是對杯杯來說最適合的決定，勉強把牠留下來，反而令牠受苦，知道這個惡耗之後，我會更加更加珍惜我三隻寶貝，只希望牠們可以健康愉快的繼續成長，這是我最想要看到的。

今日我唔係放假，但係ｍ先生就放假，佢陪我左食野，好開心～返到屋企，覺得好亂，之後又再一次大掃除，今次執得好乾脆，出左一身汗，好攰，不過見到個屋企乾淨哂，辛苦都係值得既！ｍ先生最近對我好似好返好多，開始有返ｄ愛既感覺，希望呢種感覺可以一直維持落去，雖然我知道ｍ先生永遠都唔會睇到我既日記，因為我根本冇話俾佢知我有寫日記，但我都好想響度同佢講一次”多謝你”！係你帶俾我幸福既感覺，我開心因為你，唔開心又因為你，原來你對我既影響都好大，記得大家每次分開既時候，總有一種唔識形容既失落感，你話我乖左好多，其實我仲努力中，好想成為你既乖寶寶！有好多野，我唔會親口同你講，以前我的確好任性，直到同左你一齊之後，我先搵到人生既目標，可能我講得嚴重左，不過真係要好好多謝你，多謝你響我失落既時候鼓勵我，多謝你響我最脆弱既時候安慰我，多謝你響我開心既時候陪我笑，多謝你響我最痛苦既時候給我哭訴，多謝你響冰凍既時間給我溫暖，多謝你響我大頭蝦既時候提醒我，多謝你響半夜三更我訓唔著既時候陪住我，多謝你響行雷既時候幫我掩住耳仔，多謝你一直響我身邊對我不離不棄，多謝你做既所有野都係為左令我幸福，多謝你對我所有既任性野蠻處處包容，多謝你令我既世界變得更美，多謝你．．．

今日係我ｄａｄｄｙ農曆生日，祝佢生日快樂，身體健康！我ｄａｄｄｙ響別人眼中，唔算係一個好人，但佢絕對係一個好爸爸，我同我爸爸既關係，似朋友多過似父女，我ｄａｄｄｙ媽咪思想好開通，所以我有咩事都會同佢地講，問佢地意見，我ｄａｄｄｙ有個好大既肚腩，我好鐘意挨住佢，我對住我ｄａｄｄｙ咩都可以講，我成日同佢講我好愛佢，我唔係氹佢，我真係好愛佢，其實由我好細個開始，因為一ｄ因素，我ｄａｄｄｙ唔係成日響我身邊，我咁大個女，佢打過我一次，就係因為佢打左我一次之後，俾我講到而家仲講緊，因為我有一次去牙醫度剝牙，我媽咪同牙醫攪左好耐都攪我唔掂，結果我媽咪就搵我ｄａｄｄｙ幫手，結果我ｄａｄｄｙ去到牙醫度，氹左我好耐，我都係唔肯張開口，淨係不停咁喊，佢滾滾地，就打左我人生唯一一巴，果一巴，令我可愛既面面留下一個掌印一個禮拜，當然果陣我嬲左佢好耐，果一巴掌，我真係好刻骨銘心，而家我先知道，原來當年佢為左呢件事內疚左好耐，打在我身，痛在佢心，不過到而家，呢個已經成為我小時候既趣事，響唔係好耐之前，佢做左一件錯事，間接令我負擔重左，佢一直怪自己，覺得累左我同媽咪，佢曾經問過我，問我有冇嬲佢，我都有問過自己有冇嬲佢，但答案係冇，一ｄ都冇，縱使佢令我地既屋企好重負擔，但我真係冇怪過佢，因為我知道佢唔係唔理我同媽咪，只係佢冇能力，佢想做，但無奈佢做唔到，響佢人生裡面，我同媽咪就係佢既所有，佢係一個好惡好臭脾氣既人，佢對住所有人都有一種霸氣，個個都好驚佢，但佢對我同我媽咪唔會發脾氣，就算佢幾壞，佢都冇對我同媽咪壞過，我好珍惜每次可以見佢既機會，每次見到佢我都感覺到佢既心痛，佢後悔佢所做過既錯事，但我真係好想俾佢知道，我同媽咪根本冇怪過佢，錯事人人都試過啦，我只希望，我地可以一家人永遠開開心心咁生活，對與錯都唔再去提，你永遠都係我最愛既ｄａｄｄｙ！

今日係復活節假期前夕，本來公司有好多野等住我返去做，唔知係咪因為尋晚食左藥先訓，而上今日天氣又涼返，竟然唔知醒，起身既時候已經九點，加上頭真的好痛，結果我今日冇返工，而家諗緊放完假之後，我打仗既日子又要持續落去，我就．．．唉～～

而家做緊既工作，真係好辛苦，每天一大堆大大小小既工作，我每日早上九點開始，忙到夜晚九至十點，我估冇咩幾多返寫字樓既人會每天工作十二，三，四個鐘，每日ｏｔ，但工作一樣做唔完，有時都會自怨自艾，咁辛苦為左咩丫？無他既，想俾屋企人有個好ｄ既生活環境囉，記得細細個既時候，ｄａｄｄｙ媽咪問我想唔想要細佬妹妹，我因為怕俾人分薄所有人對我既愛鍚，我答佢地唔要！而家真係有ｄ後悔，見朋友同佢地既兄弟姐妹有商有量，屋企有咩事都多個人俾意見，多個人幫手解決，而我，屋企所有大小事務都係我一個人攪哂，有問題既時候唔想ｄａｄｄｙ媽咪擔心，所以扮冇野，其實我好想有個人陪我分擔一下，我ｄａｄｄｙ媽咪得我一個女，當然視我如珠如寶啦，所以就算我幾忙都好，我都會盡量抽時間陪佢地，我而家做既一切，其實都係為佢地而做，我辛苦ｄ又有咩所謂丫，我仲後生，捱得住，我只希望佢兩個身體健康，開開心心就算，雖然我俾唔到ｄ咩既好野佢地，唔算有福俾佢地享，但我會盡可能俾最好既佢地，幸好，佢地係好易滿足既ｄａｄｄｙ媽咪，我地一家三口，去麥當當都可以好開心，ｄａｄｄｙ，媽咪，ｉ　ｌｏｖｅ　ｙｏｕ！！