比比の手札

人總會經歷失去才會學懂珍惜？也許吧？！

勇氣～！到底有幾多人會有無比既勇氣？由ｂｂ仔學行既時候需要勇氣踏出第一步開始，成長既歷程入面，唔多唔少都需要一份勇氣，生存左咁耐，我發覺原來我一ｄ勇氣都冇，就連好簡單既一步我都冇勇氣踏出，突然覺得自己好冇用，今日心情極度低落，整天做事都提不起勁，彷彿魂遊太空一樣，腦入面一片空白，忙左大半天，都唔知自己到底做緊乜野？可悲！

唔知係咪我真係諗得太多，成日覺得佢有野呃住我，尋晚我發現左ｄ野，令我諗既野更加多，有嘗試搵佢求證，當然，我問既都係”愚蠢的問題”，咩係愚蠢的問題？就係明知答案但又要問既問題，我預左佢一定答我冇野，冇事，一定知佢叫我唔好亂諗，一係就話我自己邐既野就當係真，我知佢一定話我諗得太多，不過唔問個心就會好唔舒服，唉．．．人就係咁，又要諗又要問問完又係要諗，其實我知道我可以唔駛咁佢，但無奈控制唔到，咁左又覺得自己好傻，好困擾哦～！！！

我同佢而家既相處都尚算可以，可以傾到計，不過就唔會成日傾，佢返工已經好辛苦，冇咩事我都唔會特登要佢陪我傾，盡量想俾多ｄ時間佢休息，我成日形住我地同以前唔同左好多咁，我知佢對我好，真係好好，但我總係覺得有好多野係我唔知，覺得佢有野瞞住我，自從果次分開左之後，呢種感覺越來越強烈，成日覺得全世界都知道一個秘密，係得我一個唔知，我唔鐘意呢種感覺，我有叫過自己咩都唔好諗，叫自己開心ｄ，放鬆ｄ，但我真係做唔到，我俾左好多無形既壓力自己，返工既工作壓力已經令我透不過氣，我覺得好辛苦，有邊個可以幫到我？好無助，有時會怪自己，攪到今時今日咁，都係因為自己一時之氣，就係為左一時之氣，而令到大家都咁唔開心咁辛苦，為乜？為啖氣囉，但諗深一層，事情已經發生左，而家要諗既係咪應該諗下點樣可以搵個辦法補救令大家都好過ｄ開心ｄ呢？我唔敢博，我怕輸，亦輸唔起，如果我孤注一擲響佢身上，但到最後換來一樣分開呢個後果，我覺得我會承受唔到，所以我寧願好似而家咁，又或者，我係真係需要一ｄ時間吧～

今日去左剪頭髮，剪左一個幾滿意既髮型，好似ｂｂ咁，放心，唔係好似果張ｂｂ仔相咁，不過真係剪得好得意，剪到成個小朋友咁，而且仲唔駛好貴，盛惠＄６８蚊，平靚快正抵，係咁多年以離最滿意既一個髮型，清爽自然，剪定個靚頭頭迎接夏天既來臨，心情靚靚，呵～

咁多年以離，都ｋｅｅｐ住一把長頭髮，我一向多頭髮，但都唔算難打理，我綜合左各方面既意見之後，我諗呢個髮型都會ｋｅｅｐ返一段時間，起碼唔係果種個髮型唔襯面型而個面型又撞落個身型果種，唔係誇張架，我真係成日見人係咁架，以名人”八兩金”為例，就完全符合上述既條件．．．

尋晚同呀ming傾msn傾左好耐，知道左好多關於佢既野，每個人都有好多唔想俾人知既秘密，不過經過尋晚之後，對呀ming有所改觀，同佢傾計都幾舒服，佢應該可以係一個幾好既朋友，ming…如果你睇到既話，我希望你永遠都開開心心，放得開自己，拿得起別人，世界自然大，你要加油哦～！！！

每年4月1日，是西方也是美國的民間傳統節日–愚人節。愚人節起源於法國。1564年，法國首先採用新改革的紀年法–格里歷(即目前通用的陽歷)，以1月1日為一年之始。但一些因循守舊的人反對這種改革，依然按照舊歷固執地在4月1日這一天送禮品，慶祝新年。主張改革的人對這些守舊者的做法大加嘲弄。聰明滑稽的人在4月1日就給他們送假禮品，邀請他們參加假招待會．並把上當受騙的保守分子稱為”四月傻瓜”或”上鉤的魚”。從此人們在4月1日便互相愚弄，成為法國流行的風俗。18世紀初，愚人節習俗傳到英國，接著又被英國的早期移民帶到了美國。

今日係愚人節，令我諗返起三年前既一個愚人節，張國榮響果日同我地開左個好大既玩笑，本身唔係佢既歌迷，但都幾欣賞佢，佢個樣可以話算係完美，眼耳口鼻冇一部份係唔既靚，至於佢既歌，我只鐘意聽佢既慢歌，記得果陣我仲好細個，應該是幼稚園還是小學果陣，佢同譚詠麟鬥得好勁，我個表姐係譚詠麟超級fan屎，成日聽我表姐力數張國榮不是，但其實，我係好討厭譚詠麟的=.=，我冇一個特別鐘意既一個歌手，冇偶像，我會係果種唔理邊個歌手，只要好聽既歌，我就會聽，音樂對於我離講，係每一日不可缺少既東西，平日要返工，一落到街我就會開始我既音樂旅程，返到公司即刻開電腦繼續聽，放工搭車又聽，返到屋企都仲要聽，如果放假，更加會一起身就開歌聽，我覺得冇音樂既世界我會生存唔到，近呢兩日，聽見收音機不停播返張國榮既舊歌，好懷念呢位紅極一時既超級偶像歌手，雖然覺得好可惜，但既然佢要選擇呢條路，我亦會衷心祝福佢會去到一個更加適合佢既地方。

愚人節又令我回想返小時候既一件趣事，我不嬲都鐘意整古人，俾人話我古古惑惑，ｎ年前既愚人節，講左個大話，同媽咪講我要同同學趕功課，唔返屋企食飯，點知．．．當我返到屋企既時候，竟然一個人都冇@.@最慘既係，我冇帶鎖匙，估唔到諗住整古媽咪，反而整古到自己，而家諗返起都覺得好好笑。

而家人成長了，愚人節都已經好似變得事不關己，冇果種要去整古人應節既衝勁，其實除左愚人節之外，其他節日都開始變得冇咁有氣氛，又或者響繁忙既都市入面，節日已經係生活既點綴，唔再好似以前咁多采多姿，睇離係時候將自己放鬆一點了．．．

最近有一套戲，個戲名好似叫愛女人購物狂，響某程度上，我唔會反對呢個講法，我覺得購物的，真係多數係女人，上至置地，下至加連威，我有留意過，響有野賣既地方男女比例大約５：１，即係條街十個人入面有八個係女人，講到購物，有邊個女人唔會雙眼發光丫？邊個夠膽話男人唔鐘意購物架？不過只係大家鐘意買既野唔同之嘛，貴有貴買，平有平買，我自己本身都係一個購物狂（程度：超級），有時買野會睇心情，幣在我性格上有一種缺陷，就係開心會咩都覺得靚，自然咩都想買，唔開心既時候就好想好想買好多野令自己開心返，出糧又會俾藉口自己買野獎勵下自己，糧尾又會諗住都就出糧，想買咪買囉，結果，唔駛我講啦，我既”戰利品”越來越多，咁我多數會買咩呢？等我統計下先．．．衫褲鞋襪唔少得，手袋，飾物，公仔，ｂ女，化妝品，護膚品．．．我戰利品之多，程度達黎克特制 8.5級，一個人用兩個衣櫃都擺唔哂既衫，一個鞋櫃放左廿幾對鞋仲有幾對要收響窿窿罅罅，ｂ女同公仔亦已經攻陷我成間房，床同梳化，其實我知道自己好多野，真係唔駛買，我媽咪成日掛響口邊既一句說話，”你D衫，十年唔買都夠著”，係架，佢冇作大到，真係十年（甚至唔止）都著唔哂，無奈我知道自己係多，但就係忍唔住手唔買，見到靚既，又唔係好貴，買囉！當然要睇下同行既係魔鬼定天使喇，通常男既就會話，鐘意就買啦，女既就會中立少少，至於媽咪就多數係反對派，不過我又覺得自己鐘意買野既程度達到病態階段，當然唔會要碌爆卡買啦，不過有時窮窮地，都會去超級市場狂掃貨，只要幾百蚊，就可以滿足哂我既購買慾，而且仲比較實際，其實我唔係好在乎我要買幾多野？我只係好享受買野既過程，不過我隔離果個就辛苦嚕=3=，因為佢要幫我拎大袋細袋既戰利品，好彩我識親既人都會自告奮勇幫我拎，風度可加，響度多謝你地先~^^~，不過呢，過左咁多年購物狂既生活，而家已經冇以前咁癲嚕，有時想買野，都會睇下有冇用先買，唔會好似以前咁亂買，係唔係都買，而家想買野，就會去超級市場囉，哈～其實好彩香港有我地既類人，推動香港經濟，增加就業機會，只要適可而止，購物其實可以係一種好好既享受！

我覺得每個人心裡面都會有情意結，可能係小時候希望得到既玩具，可能係一件見到好鐘意既衫想等佢大減價既時候先買，點知未大減價已經售罄，又可能係對一個人既感情，都可以係自己既情意結，好隨心咁諗左好多我自己心入面既情意結，原來有好多架喎@0@，好似細個既時候，曾經盛行一時既耶菜娃娃，媽咪話如果我考試一百分就買俾我，當然最後我梗係考唔到一百分啦，仲有blythe vm，由唔鐘意b女，變到鐘意，都係因為一隻vm，不過我而家有37隻細b入面都依然係冇vm，所以到而家都好後悔平果陣冇買到，呢d係物質上既情意結，感情上既情意結更多，對”佢”始終有個情意結，對佢我算係又愛又恨，好多時好想同佢回到過去，無奈感情變左就係變左，而家大家既關係都算ok啦，起碼響而家呢一刻，我知道我仲係好愛佢既，其實情意結係好定係唔好既冇人知，又或者可以咁講，會唔會因為得唔到先至會更加希望得到，從而產生咁多既情意結呢？總之一句講哂，好好珍惜現在所擁有既，我深信所謂”知足常樂”係冇錯架啦~^^

我一直覺得”人際關係”係一門幾高深既學問,可以令人好無奈,問題好多時視乎你點樣面對,點樣處理,點樣解決,每一個地方都存在好多複雜既人際關係,每一間公司,每一個部門,人同人之間唔多唔少都會存在呢種關係,以我為例,好多時我會選擇逃避,唔去面對,抱住一種”燒到埋離先算”既心態,但又因為係咁樣,問題會越來越嚴重,同時又會覺得好恐怖,我自問由細到大既人際關係都處理得唔錯,但就好唔明白,究竟呢一門咁高深既學問係咩東東?曾經上過幾個月既”人際關係課程”,了解到係一種心理學,所謂人際關係就即係人同人溝通既其中一道橋樑,點樣令呢道橋樑好行,就要視乎你點行,唔係每一個人得到既待遇都會一樣,有好多人都有一個自己唔知既問題存在,結果傷害左人都唔知道,說話技巧都同人際關係有好密切既關係,唔係要你成日油腔滑調,但一定唔可以出口傷人,好簡單,將心比己,你希望人地點對你,你就要點對人囉,好多時響公司遇到所謂既”擦鞋仔”,呢類人既人際關係通常處理得好好,但我就唔會認同呢一種行為,單靠擦鞋從而得到好既人際關係,其實係一件可悲既事,試問如果你每日要對住一個髮線向上移兼略帶點地中海,相信短期內要帶假髮既人,要你同佢講”你呢個髮型幾好睇”我估我一定開唔到口囉,身邊其他人都會響你背後笑到唔停,咁何必呢?要人際關係好,一定要響說話技巧中入手,多以笑面迎人,笑口常開,笑逐顏開,笑容可掬,多試試表達自己所想的,都係一種好辦法,但千萬唔好太假,以免弄巧反拙,笑下啦!都市人!!!

(以上純粹個人分析及意見)